Fréttir

• 19.04.2011

  Magnús Bjarni Baldursson ráðinn innkaupastjóri Fríhafnarinnar

  Gengið hefur verið frá ráðningu nýs innkaupastjóra Fríhafnarinnar, en hátt í 70 manns sóttu um starfið. Magnús var markaðsstjóri SpKef sparisjóðs, frá 2010 að yfirtöku Landsbankans á sjóðnum í mars 2011. Áður var hann framkvæmdastjóri Auglýsingamiðlunar-Mindshare frá 2002 til 2010, og byggði það félag upp frá stofnun. Þar á undan starfaði hann sem rannsóknastjóri hjá PricewaterhouseCoopers og sá einnig um markaðsdeild PWC. Magnús hefur einnig starfað hjá Landmælingum Íslands, Borgarlækni, Landlækni og Iðnaðarráðuneyti, svo nokkuð sé nefnt.

  Á starfstíma sínum hjá Auglýsingamiðlun-Mindshare hefur Magnús starfað við markaðsráðgjöf fyrir mörg stærstu fyrirtæki og vörumerki hérlendis, sem og við ýmis erlend verkefni. Má þar nefna N1, Nóa-Síríus, Kelloggs, Ölgerðina, Reykjavíkurborg, Íslandsbanka, Spron, Vodafone, Nettó-Samkaup, Innnes, Sterling, Iceland- Express, Íslenska Getspá, Alvögen, Orkusöluna, 365 Miðla, Árvakur, A4, BMW, Hyundai, Ásbjörn Ólafsson, Dominos, Heineken og mörg fleiri.

  Á árunum 1988-2002 sinnti Magnús kennslu við Raunvísindadeild Háskóla Íslands, m.a í aðferðafræði og lýðfræði, en frá árinu 2006 hefur hann einbeitt sér að kennslu í markaðsfræði og vörumerkjastjórnun.

  Magnús hefur verið virkur í starfi Sambands íslenskra auglýsingastofa og sat í mörg ár í fjölmiðlanefndum sambandsins. Hann var formaður SÍA á árunum 2007-2010, en sat þar á undan í stjórn sambandsins, eða frá 2004-2007. Þá hefur Magnús setið í stjórnum nokkurra fyrirtækja hér á landi.
  Að loknu stúdentsprófi frá MR. lauk Magnús B.S. gráðu frá Háskóla Íslands 1986, og meistaragráðu frá York University í Toronto, Kanada 1988 í hagrænni aðferðafræði.

  Magnús Bjarni Baldursson er kvæntur Sigríði Haraldsdóttur, sviðsstjóra hjá Landlæknisembættinu, og eiga þau tvö börn.

  
  Til baka