Fréttir

• 08.07.2011

  Ný og endurbætt Dutyfree Fashion verslun

  Í dag, 7.júlí 2011, var tískuvöruverslun Fríhafnarinnar Dutyfree Fashion opnuð aftur eftir gagngerar endurbætur. Fríhöfnin tók við rekstri verslunarinnar í júlímánuði 2010 af Icelandair. Verslunin hefur verið stækkuð um 65 m2, og er nú um 270 m2 að stærð og úrvalið af fatnaði, skóm og fylgihlutum hefur aldrei verið meira. Í Dutyfree Fashion má finna þekkt vörumerki fyrir konur og karla á borð við Boss, Lloyd og Burberry. Þess má geta að Dutyfree Fashion er eina verslunin á Íslandi sem hefur á boðstólum fatnað frá Burberry.

  Íslensk hönnun er í forgrunni eftir endurbæturnar og fá íslensku merkin nú að njóta sín enn betur en áður. Ný merki hafa bæst við, þannig að nú ættu allir að geta fundið eitthvað við sitt hæfi.
  Að sögn Ástu Dísar Óladóttur, framkvæmdastjóra Fríhafnarinnar, hefur áhugi á íslenskri hönnun aukist mikið undanfarin ár bæði hjá íslenskum og erlendum farþegum. ,,Breytingunni á versluninni er m.a. ætlað að koma til móts við óskir viðskiptavina okkar um fjölbreytta íslenska hönnun.“

  Íslensku vörumerkin sem Dutyfree Fashion býður upp á eru Farmers Market, KronKron, Spiral og Ella. Farmers Market er það íslenska merki sem hvað lengst hefur verið í sölu hjá versluninni og er margt nýtt og spennandi að koma frá þeim um þessar mundir, bæði fyrir dömur og herra. KronKron hefur heldur betur slegið í gegn, eftir einungis þriggja mánaða sölu í Dutyfree Fashion. Skemmtilegt samspil lita og efnasamsetningar gera hönnunina spennandi og er ljóst að Hugrún og Magni, sem standa á bak við KronKron, eru komin til að vera. Til marks um það er að haustlínan þeirra, sem kemur í sölu í ágúst, er mjög litrík og skemmtileg og full af nýjungum. Dutyfree Fashion hefur verið með skó frá KronKron, sérhannaða fyrir verslunina og fást þeir því hvergi annars staðar og verður svo áfram.
  Spiral er tiltölulega nýtt af nálinni hér á landi en bak við það merki standa tvær hugmyndaríkar konur, þær Ingunn E. Yngvadóttir og Íris Jónsdóttir. Spíral er með mjög fjölbreytt úrval af kjólum, bolum, leggings og ýmsum fylgihlutum. Þetta er merki sem segja má að margar konur hafa verið að falla fyrir.

  Nýjasta merkið ELLA hóf göngu sína í Dutyfree Fashion í dag. Nafnið ELLA kemur frá einum eiganda fyrirtækisins, Elínrósu Líndal. ELLA býður konum klassískan og tímalausan fatnað. Ilmvatnið ELLA, sem Elínrós setti á markað fyrr á þessu ári, DAY&NIGHT, má finna í Fríhöfninni.

  Ásta Dís Óladóttir, framkvæmdastjóri Fríhafnarinnar segir að viðbrögð viðskiptavina við íslensku hönnuninni hafa verið mjög góð. ,,Stækkunin á versluninni gaf okkur þann möguleika að bæta við fleiri íslenskum hönnuðum. Við erum nú með þessi fjögur íslensku merki sem ég er sannfærð um að koma muni öll mjög vel út í sölu, hvert á sinn hátt, og markhópurinn er mjög breiður.“
  ,,Síðar á þessu ári munum við svo auka úrvalið enn frekar og við stefnum einnig á að auka úrvalið fyrir yngri farþega. Það verður því spennandi að sjá hvaða nýjungar Dutyfree Fashion mun kynna á næstunni.”
  ,,Það besta sem verslun í alþjóðlegri flugstöð getur gert er að ýta undir íslenskar vörur og það höfum við svo sannarlega gert, framleiðendum og viðskiptavinum okkar til mikillar ánægju. En það er ekki aðeins til góðs fyrir viðskiptavini verslunarinnar því auðvitað hefur þetta margháttuð áhrif fyrir hagkerfið í heild sinni, og á það leggjum við einnig mikla áherslu.“

  Fríhöfnin ehf. rekur sex verslanir í Flugstöð Leifs Eiríkssonar. Fríhöfnin og Dutyfree Fashion eru staðsettar í brottfararsal. Verslunin Iceland Dutyfree, þar sem selt er eingöngu íslenskt áfengi, sælgæti, snyrtivörur og fylgihlutir, er staðsett í suðurbyggingu ásamt Dutyfree Last minutes Shopping. Einnig rekur Fríhöfnin verslun fyrir farþega sem eru að fara til landa sem eru utan Schengen svæðisins. Við heimkomu geta farþegar svo endað ferðalag sitt í komuverslun og keypt tollkvótann, sem reyndar var aukinn fyrir skömmu, snyrtivörur, leikföng og sælgæti.

  Fríhöfnin býður farþega velkomna í nýju Dutyfree Fashion verslunina, svo og í allar aðrar verslanir fyrirtækisins, og bendir fólki á að gefa sér rúman tíma í Flugstöðinni fyrir brottför. Það getur margborgað sig.

  Smelltu á myndina til að sjá fleirri myndir frá opnuninni

  

  
  Til baka